Nueche de llenadera y buena música una vegada más en
Valles, anque suene yá a lo de siempre. Laurence Jones llegaba col halu de mozu
xeniu y promesa del blues européu avalada por una biografía curtia –dada la so
mocedá- pero con bien de premios, buenes critiques y una xira estratosférica
per delantre. Y en Valles trunfó una vez más, metiendo’l públicu en bolsu con munchu
méritu, con un conciertu qu’empezó fuerte y fue ganando más y más intensidá
hasta españar la sala nun aclamaísimu bis.
Tres discos en tres años avalen tamién la so brenga de
componer y la so efervescencia. En formatu tríu, el mozu repasó n’hora y media
la mayoría de les sos composiciones tresmitiendo una verdadera pasión y gayola
n’escenariu que nun tuvo dificultá n’apegar a los que tuvieren la suerte de
garrar sitiu ena apinaísima y cada vez más falta de güecu sede de Valles.
Nel repertorio una continua descarga de blues rock, con
guiñaesa al blues más clásicu del que bebió na so curtia pero productiva vida,
temones lentos, daqué de psicodelia y una guinda funky bien intensa.
Compisiciones propies ena so mayoría -acompañáu a veces de lletres desesperaes
que’l xoven atacaba con una voz suavemente resgada- y que s’afanaba en
presentar llargamente enfrente d’una repleta sala que malapenes lu entendía
pero que respondía con xiblíos y aplausos llenos de buenes intenciones.
Con una primer parte ena que pudimos comprobar la buena
técnica y el gustu compositivu del rapaz, pero que resultó tovía un pocu fría,
la versión de Hendrix/Dylan “All along the watchover” marcó’l puntu d’inflexión
a partir del cual tou fue ganando en calor y coloríu, tantu perriba como debaxu
l’escenariu. Tema a tema fueren enriestrándose riffs, melodíes y solos, la
presencia rítmica fue ganando tamién protagonismu, empezamos a sudar y cuando
por sorpresa llegó la despidida del grupu, la masa ferviendo nun hubiera dexáu
baxar como si nada a los músicos d’allá arriba. La verdá ye que nun fizo falta.
El tríu, de perbuena gana, pues se los vía encantaos de la vida, regalómos un
bis apoteósicu con un tema funk bien cañeru, seguíu del conocíu “real blues”,
según les palabres de Jones “Everyday I have the blues”, y terminando col “Bullfrog
Blues” de Rory Gallagher pa salir del escenariu y mangase yá nel olimpu de los
dioses de Bocanegra.
El formatu tríu y el protagonismu del solista malapenes
dio pa que se llucieren los músicos acompañantes, un batería discretu pero
eficiente y certeru, un baxista finísimu qu’actuó de mullíu pero robustu
colchón rítmicu, tirando bien de veces de los temas, y otres veces impulsando
los riffs de Jones como una invisible corriente térmica qu’elevara a una
maxestuosa ave planeadora.
Namás en dellos momentos echamos en falta la voz rota
pola desesperanza y el licor, les sueles escomiciaes pola derrota y les
engurries del fracasu y la pérdida que-y dan alma al blues y que nun mozu tan frescu
resultaríen inverosímiles. Nada que la vida nun cure, pero otra parte. En fin y
en pos, esperamos qu’esti fenómenu tenga una llarga y magnífica crrera porque
tien munchu que dicir tovía. En resumen: fue un conciertu fantásticu.
Conchi Gálvez
Traducción de Miguel Isla
El conciertu del
pasáu sábado del estaunidense John Nemteh y el so tríu solo puede calificase de
desllumbrante. L’artista llegaba a Valles derechu de Suiza, onde había tocáu la
nueche anterior, y pisaba per primer vez un escenariu n’España... el de Valles,
supongo que frayáu, ensin falar gota castellanu, y ensin saber qué facía en
mediu d’aquel pueblucu enanu. Ena sede aguardábase’l conciertu con mucha gana.