El sábado 31 de xineru celebramos
el séptimu aniversariu de l’asociación Bocanegra col prestosu conciertu del
sestetu madrilanu ‘TheClams’. Un fechu que pasó casi desapercibíu tantu pal
públicu que fue al conciertu como pa los propios socios. Paez que cuando les
coses furrulen -y bien- se fagan soles. Pero noooon ye asina. Cualquiera que dalguna
vez participara ena organización d’un eventu, por cenciellu que paezca -un baile
nel institutu, una fiesta en pueblu, el cumpleaños del guaje- sabe qu’estos
acontecimientos acarreten un trabayu curiosu. Nel nuestru casu, la búsqueda de
les bandes y la programación de los conciertos, el contactu colos músicos y l’acomodu,
la preparación y acuriosamientu del local–arbañilería, carpintería, fontanería,
eletricidá y mil chapuces más incluíes-, el soníu y la iluminación, la difusión
y otres milenta coses suponen munches hores de trabayu pa l’equipín qu’integra
la directiva de l’asociación, y que nun tienen más fin nin más compensación que
los momentos vivíos cola música en directu. Nun ta de más agradecer esi trabayu
‘invisible’ y tan valiosu de los que tán siempre ehí detrás ena sombra, y tamién
el sofitu de socios y simpatizantes qu’acuden a los conciertos y contribuyen asina
al so caltenimientu.
Pero bueno, vamos volver a la
crónica del conciertu del sábado. A pesar de lo gafu de la nuechi en cuestión
-climatolóxicamente falando- la esperiencia coles amasueles fue de lo más prestosa.
La sede taba atacada y agradecíase espacialmente el ‘calor humanu’ nuna nuechi
tan fría. La banda sorprendió y namoró desde’l primer tema, tantu pola frescura
y la gayolera puesta n’escena de les intérpretes, como pol cudiáu repertoriu, los
arreglos y el emplastie instrumental. El soníu, como siempre, resplandiente, a
pesar de los problemucos fadios d’un cable. Un show repletu de soul y rythm&blues
ofrecíu en formatu sestetu (faltó la saxofonista por causes mayores), demostrando
seguridá y firmeza nel escenariu, y mui buen rollu col públicu.
Como suel asoceder enos conciertos
de soul, paez que’l protagonismu lo lleve siempre la voz cantante -Aida Clams
nesti casu-, una muyer con una voz llena de maraviyosos rexistros, un color brillante,
fuerza y picardía, que mos emocionó y acalorió per momentos. La presencia
permanente y el refuerzu tantu instrumental –baxu, batería, guitarra y unos
espresivos vientos- como en coros per parte de la banda, siempre atenta, aportó
un curiosu colchón a la voz solista.
El repertoriu combinó temas propios – los espublizaos nel so
primer discu y los que formarán parte del segundu, a piques ya de salir a la
venta- con otros bien conocíos d’Otis Redding, ‘Barbara Lynn, ‘Wilson Picket (con
coros del públicu incluíos) o Ray
Charles.
Enerxía a mamplén, rises y buen
rollu nel escenariu, que se-y pegó a un públicu folixeru y encesu, dispuestu a
bailar y a pasalo bien desde el primer tema. A petición de la solista entamóse
en mediu la sala una soul train line pela que desfilaren gayoleros los más
intrépidos, mentes el restu la sala bailaba y palmiaba lo que podía. La
interacción banda-públicu fue costante a lo llargu de la hora y media de
conciertu, y pidióse con insistencia un bis que terminó con un apoteósicu ‘Proud
Mary’.
Agradecimientu y amor eternu a
‘TheClams’ pol buen ratu que mos ficieren pasar, y felicitaciones a la gran
familia Bocanegra por traénosles a casina, y por tou lo demás.
¡Que nun pare la música!
Conchi Gálvez
Traducción de Miguel Isla
No hay comentarios:
Publicar un comentario