Bonfanti ye un guitarrista británicu que bebe de les fuentes del blues rock más clásicu, acompañándose d'una voz profunda, a veces esgarrada y áspera, a veces seductoramente modulada. Magar de la xuventú cuenta ya con dilatada esperiencia enos escenarios, alternando la so participación en bandes consolidaes colos sos trabayos en solitariu. Les sos influencies pasen de los clásicos del blues como Muddy Waters o Howlin’ Wolf hasta grandes bandes como Led Zeppelin o los Stones. Nesta pequeña xira española escoyó el formatu tríu -acompañándose del batería Craig Connet y el baxista Matthew Waer- pa presentar los temas del so últimu y abondu recomendable discu, ‘Shake the Walls’. Les referencies sobre'l músicu y lo vistu n'internet eren inameyorables. Como siempre, l'encantu del directu, y el estupendu soníu que habitualmente disfrutamos ena sede de Valles cumplieren les expectatives. Bonfanti ye un músicu de directu, magar que la producción del discu ye magnífica y echárense en falta, por exemplu, les armóniques nel escenariu de Valles. La so entrega sobre l'escenariu ye absoluta, la so brenga desbordante y la so orixinalidá ena composición y la interpretación admirable. Les sos referencies clásiques son incuestionables, el rock y el blues son lo de tola vida, pero tou suena a nuevu y a diferente. Puru talentu.
El conciertu fue de menos a más, rítmica y emotivamente alandohablando. Arrancó col reciu ‘Alley cat’ nel que ya mostró una enerxía y un dominiu de la guitarra y del so gañatu impresionantes. La so personalísima forma d'atacar l'instrumentu, tantu enos riffs como enos punteos -fuertes, poderosos y bien sofisticaos-, cáltuvose en tola sesión, cuando mostrando un peazu soníu de lo más rockeru cola so guapina Gibson SG, cuando acompañándose ena acústica con un slide qu'enfatizaba su llau más blueseru.
Los temas se iban incardinando en riestra con una coherencia y un buen gustu admirables. Ente los más lentos, destacamos ‘Honey’ maraviyosu tema, nel que son notables la llimpieza de voz y guitarra, un tema puru que mos fai descender a los raigaños más dolientes del blues; ‘Jezebel’, con un frenéticu y afiláu solo; ‘Devil girl’ una balada profunda con una onda country blues que parez salir del mismísimu fondu del pantanu; el cañonazu hard rock ‘Stone me Sober’, que podría volvese en tou un clásicu, y nel que'l músicu desplegó'l so gran poderíu vocal, o el polvorientu ‘Cheap whisky’. Un repertoriu llenu de temones, más de hora y media sin tiempu pa alendar, al que se sumaríen otros tres nel bis que'l públicu satisfechu pidió con insistencia. Ye que tou mos paez pocu una vez encesos.
Frente al protagonismu del guitarrista y cantante, una limitada base rítmica, más pol discretu baxista que nun llegó a sincronizar con un baterista llenu de posibilidaes pero desaprovecháu. Nostante, y en conxuntu, un conciertón de notable altísimu, ye dicir, dignu sobresaliente, calificación a la que ya mos tamos avezando n'asociación Bocanegra, y que intentaremos caltener mientres se pueda. Cuidaín cola programación que vien, amigos, que nun tien desèrdiciu.
Conchi Gálvez
Traducción de Miguel Isla Viesca
