CONCIERTU de MORELAND & ARBUCKLE 06/DICIEMBRE/2014

Desde Wichita (Kansas) llegábamos a Valles el peculiar tríu lideráu por Aaron Moreland (guitarra y cigar box) y Dustin Arbuckle (armónica y voz), al qu’acompañaba el baterista  Kendall Newby. Los de Kansas diérenmos caña de lo buenu, a traviés d’un huracanáu repertoriu surdíu de lo más fonderu del Delta  y adobáu cola contundencia del buen rock and roll.

Tán de xira per España y nun recibieren más que buenes crítiques y petazos de les sales. Equí en Valles teníamos gana d’ellos y sabíamos que había xente que diba a venir desde distintos puntos d’Asturies pa velos. Asina que, como ye habitual, la sede se abarrotó. Hai que dicir que empezaren con bien de retrasu, unos 45 minutos, y los que llenábamos la sede tábamos ya un pocu impacientes y mosqueadinos cuando los tres subieren por fin al escenariu. Pero colos primeros acordes ya yos perdonamos la falta y mos dexamos cautivar pola so arrolladora propuesta de blues rock, power blues, roots rock o como quiera que se llame  lo que faen.

Per más de  90 minutos mos tuvieren en movimientu ensin descansu, con un repertoriu que nun pue dicise que fuera ‘in crescendo’, ya que en verdá fue cañeru desde’l minutu cero. Presentaren temas fundamentalmente del so últimu y cuartu discu ‘7 cities’, daqué adelantu de lo que será’l nuevu,  y versiones de los grandes como Muddy Waters, Little Walter, Jimmy Red, Slim Harpo o Bo Didley.

Cenciellez, grandeza y munchísimu sentimientu, esa ye la del blues, lo que lo fai fascinante. Llama l’atención ver cómo temas conocíos, versiones clásiques, suenen tan diferentes según qué banda o solista los interprete. Esti dúu tien una gran personalidá a la hora d’abordar lo clásicu, dándo-y  una contundencia y un puxu más que notables. Sorprendionos enforma ver y escuchar cómo con tan pocu se puede facer tantu. Ensin grandes fanfarries técniques nin instrumentales (nin siquiera un baxu, namás se animó Arbuckle a sacalu nun tema), caltienen una tensión absorbente en tolos temas, elegancia y munchísimu poderíu. Rescampla’l so amor al blues y el so pasu pela escuela del rock’n’roll más xenuín. La voz de Arbuckle ye profunda y escura, y cesa pa dar pasu a l’armónica que domina y a la que consigue facer aullar con más dolor qu’alegría. Y lluego esa Cigar Box que se marcó el gran Moreland (fecha por él mismu) vaya soníu más auténticu que-y sacaba, combinando coles cuatro cuerdes los llabores de baxu y de guitarra. Tamién mos prestó’l baterista, siempre discretu y bien asitiáu, mui importante rítmicamente con lo exiguu de la formación, y que se marcó un solu bien prestosu tando ya el concierto p’acabar.

Los que ellí tuviemos pasámoslo pipa durante tola actuación. A los bises berrábamos como siempre ‘otres tres’ y los chavales cumplieren con gran agradecimientu. Tres temones finales que incluyeren daqué de Zeppelin y que acabaren de ponemos a toos ‘colos pelos p’atrás’  cerraren esti magníficu conciertu que nun mos importaría repetir para la próxima xira 2015.

A la espera del últimu conciertu del añu ena nuestra asociación, podemos dicir ya ensin vergoña qu’esti 2015 mos pasamos más de tres pueblos en calidá de la programación. El listón ta más qu’altu pal nuevu añu, yo creo que’l próximu retu ye’l de traenos a Lenny Kravitz el 17 d’agosto y fastidia-y la esclusiva al Ayuntamientu de Xixón.

Conchi Gálvez

Traducción de Miguel Isla Viesca

CRÓNICA THE BUTTSHAKERS 22/NOVIEMBRE/2014

Tovía tamos col ritmu en cuerpu a la hora d’escribir estes lletres. El torbellín Buttshakers ofreciómos una sesión de buena música adobada con ciertos elementos que presten a tou el mundu: repertoriu bien escoyíu, técnica y pasión ena execución, soníu de calidá, buenes vistes n’escenariu (sí, eren toos bien curiosinos y cool), complicidá col públicu, y un  frontman (nesti casu woman) con carisma.

La banda francesa, nacida en 2007 y con cuatro discos ya en mercáu recibíos toos con perbuenes crítiques, venía presentando n’España l’últimu d’ellos, denomináu ‘Night Shift’, un caleidoscopiu de

Soul, rythmblues y funk mecíu con respigaos toques roqueros.

Como pioyos en costura tábamos ya ena sala antes siquiera de que los músicos subieren al escenariu. La sala de Valles quedó pequeña p’aquella masa ondulante que se movía con dificultá, toos morriendo por un pocu más d’espaciu vital pa mover l’esqueletu o arrimar la copa al gañatu. La banda ansina lo merecía y la temperatura fue subiendo ensin parar a lo llargu la nuechi.

El grupu diba encabezáu pola cantante estaunidense Ciara Thompson, una maravilla del ritmu  dotada d’una voz lleonina y potente, llena de fuerza y sensualidá, a la que l’activa banda arropó en tou momentu. El conciertu, tou un homenaxe al soníu Motown, anque con toques más áspero-garaxeros, fue de menos a más. Arrancó un pocu acartonáu -paecía que’l técnicu nun acababa de saca-y soníu a la sala, y los temas resultaben un poquiñín secos  y duros- pa dir ganando ductilidá y soltura tema a tema. Un repertoriu cada vez más animáu y bailoteru, véase ‘Wicked woman’ ó ‘Get your blues’ por exemplu, ensin una triste baladuca con que recuperar l’aliendu. La banda destiló gota a gota ritmu de lo buenu, sobresaliendo, sobre una base rítmica perbien empastiada, un guitarrista mui grunge y un par de vientos-saxo barítonu y trombón- omnipresentes y de puxu esgarráu y furiosu.

La gayaspera Ciara, con una efervescencia cautivadora, movíase si sin parar y animaba al públicu a movese con alegría y descaro, anque a lo Chiquito mos movíamos toos, nun daba pa más l’aforu. Tres una hora de conciertu imparable que se mos pasó volando y ante la anunciada despedida, a los músicos víaselos a gustu y agradecíos, el públicu pedía ‘otres tres’ al altu la lleva y mangarenmos un bis de 4 temones frenéticos, como’l ‘Tell the truth’, o el ‘Night Shift’ que da nombre al discu, incluyendo tamién un homenaxe a la gran Etta James. 

Peazu grupu más que recomendable, mui de directu, d’esos que se dexn ‘la piel nel pelleyu’ y te llenen de enerxía, a los que agoramos un potente carrerón enos próximos años.

Conchi Gálvez

Traducción de Miguel Isla

CRÓNICA DELTA MOON Y DIXIE TOWN

Si los músicos son como toquen, en verdá esti vienres topamos unos ‘high class’ dientro y fuera del escenariu. Asina fue'l conciertu de los estadounidenses Delta Moon, banda con un soníu profundamente sureñu qu'entemez elementos del blues clásicu, el folk, el swampblues, y el roots rock y que destaca pol acertáu usu del slide.   

A falta de la banda d'entrada, Dixie Town, que nun pudo llegar al conciertu tras quedar tirada ena carretera, p'hacia les 23:00, y cola sala vacía -al públicu hubo casi que agarralo pel cuellu pa metelo pa dientro, de lo guapa que taba la nueche fuera y el ambientín qu'había en chigre- empezaren a sonar los primeros acordes d'un conciertu de más de dos hores llenu de buenos momentos. 

Delta Moon ta integráu por dos grandes guitarristes de blues procedentes d'Atlanta, Tom Gray y Mark Johnson, que s'acompañen con una sección rítmica -baxu y batería- variable pero bien profesional. Lleven tocando más de 20 años xuntos, y eso nótase munchísimu nel perfectu entendimientu y l'empaste que muestren n'escenario. Tom Gray, compositor de la mayoría de los temas, canta tamién, con una voz áspera y un pocu rota anque confortable, y acómpañase cola so guitarra lap steel mediu echada sobre les rodilles, y los deos de la mano derecha llenos de púes, mientres Johnson lu sigue bien de cerca con una eléctrica del llimpísimu soníu y el so inseparable dedal. Son la pareya perfecta. Nellos lo complicáu paez cenciellu, l'ego y el ‘porque yo lo valgo’ dan pasu a un llinguaxe perfectu nel que ningún ta pencima l'otru, demostrando, amás, una manifiesta técnica, una cortesía y un saber tar al compartir escenariu exemplares. 

El lluengu repertoriu que mos ofrecieren puede resumise como ‘deliciosu’, llenu de reposáu buen gustu, talentu y saber facer. El d'esti vienres, guapamente fue ún de los meyores dúos de  slide que pasaren pel nuestru escenariu, y de los que yo vi ena vida. A lo llargu del conciertu, qu'empezó bastante tranquilu y acabó con un bis llargu abondu, escuchamos verdaderos temones como ‘Hell Bound Train’, ‘Black Cat Oil’, ‘Midnight train’, ‘Black Coffee’, o ‘Clear blue flame’, y delles versiones, como la conocida ‘You gotta move’ de Fred McDowell. Melodíes, soníos y riffs que sonaben a conocíos, llenos de llugares comunes, desde los aires más vieyos del Delta de Robert Johnson hasta los más eléctricos de JJCale, Canned Heat , Ry Cooder o el rollu Mark Knopfler colos Notting Hillbillies 

El cuartetu sonaba de muerte, d'afechu empastáu, llustrosu. Caún nel so papel, Tom y Mark muestren el so personal estilu y el so nivel col slide y lap steel, pero sobresalen  y empodérense enos diálogos, dúos brillantes que fluyen como quien nun quier la cosa y medren con una naturalidá maxistral. A pesar del coloríu de les dos guitarres, la palpitante base rítmica tuvo en tou momentu nel so sitiu, con unos acompañantes impecables –siento que nun guardé alcordanza de los nombres- que tamién tuvieren momentu pa llucise individualmente, cuando los dos guitarristes se retiraren con elegancia a un llau del escenariu. 

Lo de esti vienres nun fueren h.ueos d'artificiu, ni españíos de decibelios. Delta Moon ye otra cosa. Los ellí presentes - los de siempre y cares nueves- gozamos d'una música reposada, ensin rinchíos, pero llena de buen gustu, una profundidad y una honestidá d'eses que lleguen dereches al corazón, y que mos supo a gloria. Mostraren el mismu buen rollu nel escenariu que fuera d'él, cuando departieren amistosamente colos fans que per ellí abeyábamos. Tou un exemplu de clarividencia y noble veteranía, que sin estridencies lo demuestra tou cuando nun tien yá nada que demostrar. Más de dalgún ‘rockstar’ tendría d'habe apaecíu per equí pa flipalo un pocu, ¿o non? 

Conchi Gálvez 

Traducción de Miguel Isla