CONCIERTU/MUESTRA PABLO CANALÍS 01/06/2013

Pablo Canalís abre un ciclu dedicáu a otres músiques y soníos. Vamos dedicar tres fines de semana del mes de xunu a ello y escomenzaremos cola presentación d’esti magníficu trabayu, un llibru/discu llamáu “Folclores Imaginarios” y, como’l so propiu nome indica, treslladarémonos a los folclores más tribales de los cinco continentes a traviés d’una muestra d’instrumentos étnicos acompañaos de comentarios de los mismos y lo más relevante en cada casu. Va ser el sábadu día 1 de xunu a partir de les 20:30. Cuidaín col horariu porque tantu esti día como’l próximu sábadu 8 arrancaremos a una hora que nun ye la habitual, les 20:30. Pablo Canalís vendrá acompañáu d’otros dos músicos pa mostrar los soníos más inusuales recoyíos ena so amplia y maraviyosa coleición. Amás él ye un multiinstrumentista y compositor esceicional galardonáu en delles ocasiones, de les cuales la última fue seleicionáu como meyor baxista enos Amas 2011; formó parte de varios grupos ente los que cabe destacar la banda de rock progresivu y músiques de vanguardia Senegul, al igual que los dos músicos que lu acompañarán. Con esta formación tienen grabáu dellos álbumes y xiráu per España y Portugal. Dexamos unos enllaces pa ampliar la información y ver un videoclip que publicó nel mes d’abril y que presta pola vida.

http://www.youtube.com/watch?v=q6HtgQ0mC_k 

http://www.pablocanalis.es/

Traducción: Miguel Isla Viesca

CRÓNICA DE THE MUGGS

THE MUGGS EN CONCIERTU 17/05/2013

El pasáu vienres 17 de mayu, y pa alegría nuestra, pasó per Valles “The Muggs”, enorme tríu de blues-rock integráu por Danny Methric a la guitarra y la voz, Tony DeNardo al baxu y Todd Glass a la batería.

La espectación y les ganes eren considerables. El grupu venía avaláu por dellos premios y reconocimientos nel so país, y poles esitoses xires europees que ya los hubieren traíu a España en tres ocasiones. La d’esti añu, que los llevará amás a Alemania, Holanda, Francia y Italia, corresponde a la presentación del doble discu “Full Tilt”, grabáu en directu en 2012, y qu’incluye temas de los anteriores “The Muggss” (2005), “On With The Show” (2008) y “Born Ugly” (2011).

La banda llegó puntual a la prueba de soníu, que se resolvió enseguida y ensin problemes, apenes unos minutos de pequeños axustes y control de volúmenes sin tener que dar más vueltes, y onde ya percibimos que se mos venía encima una nueche de les grandes. Na cena mostrarense mui cordiales y comunicativos. Son tipos senciellos, que disfruten del placer de viaxar y ver mundu, a los que-yos presta charrar y conocer xente. Afirmen que tuvieren suerte y que les coses-yos van bien, pa ser, según palabres suyes: “una senciella banda de rock and roll de Detroit como munches otres” que tuvo el privilexu de poder salir del país y xirar per Europa ya en cuatro ocasiones.

Alredor de la mesa charramos de la so historia nestos 12 años d’esistencia, de la música que-yos presta: The Beatles, Led Zeppelin, Rory Gallagher –lo de Danny por esti home ye adoración-, Humble Pie, Muddy Waters BB King, Taj Mahal, The Who, the Kinks, Black Sabbath, Howlin wolf , Albert King y munchísimos otros…, de lo mal que se come’n Detroit y lo bien que se come n’España (incluida la foto mítica d’un güevu fritu con arroz que Tony manda a los colegas), -y de “vaya buenu que ta’l vino”-, del preciu al que tan llegando les reventes pal conciertu de Springsteen nel Molinón (quedaren flipaos), de lo bien que suena la nuestra sede… en fin, de lo de siempre pero con munches rises.

P’hacia les 11:30, y cola sala de Valles mui ambientada, los músicos suben por fin al escenariu. Los primeros acordes del blues “6 to midnite”, el tema col qu’arranquen el conciertu son contundentes. El públicu, que ta con ganona, resfrégase les manes y da el aprobáu “ipso facto”. Sin descansu siguen con “Sturm und Drang”, más reposáu pero contundente y “Hats off to  Mr. Beardsley”. El guitarrista ye mui versátil, encadena riffs clásicos y solos de lo más personal con total naturalidá, acompañándose d’una voz un pelín rota y auténticamente rockera. Depués de “Losing end blues”, d’influencies  ZZtopianes llega la primer versión de la nueche, el tema “I take what I want” de Rory Gallager’, que la xente recibe con gayola. Tras esta, na suxerente “Said and Done”, Danny métenos de cabeza na psicodelia tras una intro más endurecida, y acelérase con “Doc Mode”, onde lluz con ferocidá les sos camaleóniques facultaes. Per parte suya, el restu la banda tampocu nun apara. Tony toca el baxu con un tecláu. Un accidente vascular dexo-y va unos años la mano derecha insensible, pero consiguió adaptase a esti nuevu instrumentu y guía la seición rítmica en buena complicidá cola allocada y magnífica batería, que paecen tres.

Depués d’un descansu, la segunda parte revienta l’escenariu con una más que zeppeliana “Never Know Why”. El públicu ya ta caliente y celebra ximielgando la cabeza al unísonu temón tras temón. Depués de “Need Ya Baby” y “Gonna Need My Help”, encadenen tres versiones: un personal y reforzáu “Help” de los Beatles, al que sigue un nuevu homenaxe a Gallagher con “Used to be” y la conocida “Rattlesanake shake” de Fleetwood Mac. Tras casi dos hores d’intensu conciertu los músicos quieren despidise, pero la sala, ferviente y encesa, pide más. Tovía mos regalen un par de bises que la xente, apasionáu, agradez con sinceridá.

Depués del conciertu, saludos, fotos con tou el mundu, firma de discos, cerveces y buen rollu en xeneral. El subidón tovía mos diba durar un cachu más. Una nueche más de maxa y rock and roll en Valles; ye lo que mos presta y ye lo que queremos. Y dásenos perbién, oyi!!

Conchi Gálvez

Traducción: Miguel Isla Viesca