Homenaxe en toa regla al gran
Jimi Hendrix de la mano del potente tríu ‘Manic Depression’. La banda d’Avilés,
integrada por tres grandes admiradores del guitarrista magnéticu, estrenaba en
Valles esti sentíu tributu nel que la maxa del de Seattle inundó les cuatro
esquines de la sede y parte del extranxeru.
Acudimos al conciertu con una espectación
fuera de lo normal pola especial querencia que setimos hacia’l universu sonoru del
que pa munchos ye’l meyor guitarrista de la historia del rock’n’roll. Munchu se
escribió de la finura de Hendrix, de la so orixinalidá, inxeniu creativu, de la
so revolucionaria técnica, de los sos directos incendiarios. Pa min la so música ye, sobre tou, llibertá. Una
música orgánica, sexual, absolutamente viva.
Los antecedentes de los tres
intérpretes de la nueche eren buenos. A Sergio ‘Tutú’ Fernández ya lu
hubiéramos vistu tocar con ‘Alto Volto’ en Xixón y hubiera convencíunos el so
elegante estilu enes cuatro cuerdes y la so manifiesta conexón con Miguel
Herrero a la batería. D’esti pocu queda por dicir ya a estes altures. Obviando’lso
nivelazu como productor, compositor o arreglista, rescampla tamién como multi-instrumentista.
Lo mismu lu topes tocando la batería, que al baxu, la guitarra o el fliscornu,
tou con una facilidá, un gustu y una versatilidá plasmantes.
En fin, tou un talentu musical el d’esti hombre, de lo meyor que tenemos
n’Asturies. El terceru de los componentes, Rubén Álvarez, era el más desconocíu
a priori. La curiosidá por saber quién se atrevía llevar al escenariu temas d’esti
semidios del rock taba matándome. Ensiguida al ve-y la cara recordé que hubiera
pasáu pocu tiempo atrás pel nuestru escenariu de Valles, formando parte de la
banda de los hermanos Tejedor, en un papel básicamente rítmicu frente al llucimientu
de gaita y cordión. Nesta ocasión el so forzosu protagonismu reveló un fondu
conocimiento y amor pola obra de Hendrix, recreando tola so psicodélica enerxía
y xenialidá.
La hora y media de conciertu fue
un continuum de los superhits de la Jimmi Hendrix Experience: abrieren col que
da nombre a la banda, ‘Manic depression’, encadenando temón tras temón (póngolos
ensin orden porque nun di col el setlist ni apunté nada, del subidón que
llevaba): ‘Crosstown Traffic’, ‘Fire’ ‘Foxey ladie’, ‘Stone Free’ ‘Voodoo
Child’, ‘Hey Joe’, ‘Little Wing’, el bluesazo ‘Red House’,‘The wind cries mary’’,
‘Purple Haze’, la versión de ‘Sunshine of your love’ de Cream y daqué otru que
seguru me quedó nel tinteru. A pesar de que en ciertos momentos podía vese la
falta de rodaxe del recién estrenáu repertoriu, la esperiencia d’estos
profesionales tuvo en tou momentu penriba de cualquier embrollu, del que
salieren con soltura y estilu.
Nel escenariu, pura descarga de
hard rock, psicodelia y blues cola llibertá que el tríu orixinal supo inspirar.
La base rítmica, con impecables llinies de baxu, xunta una batería sólida y
contundente baxo la segura pegada de Herrero, al que-y salíen les baquetes
volando de vez en cuando de pura caña, crearen unes recies blimbes pal llucimientu
de la guitarra. Transmitiendo una palpable devoción por el Jimi original, Rubén
recreó rifs, melodías, solos y efectos
sonoros de tou tipu. El peazu d’equipu que llevaba consigo permitía-y emular
con envidiable fidelidá les resonancies y efectos de la Fender de Hendrix, los sos
aullíos, les sos textures, la so increíble densidá y al mismu tiempu la so llixereza
única. Tou ello con una oportuna dosis de improvisación, característica de la
orixinal Experience y enes que Rubén se mostró en tou momentu bien cómodu.
A pesar de que nun éramos munchos
los presentes ena sala, el impecable sonido, la música envolvente y
psicodélica, y las imágenes de Hendrix y la so banda ena gran pantalla del escenariu,
metiérenmos a más d’ún en un trance especialmente deliciosu y sensual. Tras 90
minutos de bien escoyíu repertoriu acabaren con un bis mui reclamáu ente los
que tábamos ya encesos, repitiendo el ‘Crosstown Traffic’ y la versión
asturianizada pero igual de montés del himnu estadounidense barres y estrelles,
sustituíu equí pol ‘Asturies patria querida’.
Un conciertu del que mos quedó un
estupendu tastu y que hubiera fechu les delicies de cualquier aficionáu a la
música de Hendrix. Felicitamos al estupendu tríu ‘Manic Depression’ grandes
amigos de la nuestra asociación y esperamos que esta actuación nun fuera la
única y tengan ocasión de movela per otres sales col so estupendu directu. Mui
recomendable.
Conchi Gálvez
Traducción de Miguel Isla
