.jpg)
Los dos últimos conciertos
celebraos en Valles esta pasada Semana Santa tuvieren enmarcaos enos ‘III Alcuentros
con les músiques feches n’Asturies’, una apuesta de l’asociación pola difusión
de la música asturiana de raíz y que siempre despertó la simpatía de los socios
y veceros de los nuestros conciertos. La
programación incluyía una apuesta variada, que unió estilos clásicos,
innovadores y populares. El xueves Santu sonaren en Valles ‘Tejedor’ y
‘Vrienden’. Los primeros nun precisen presentación, pues son una de les bandes
más reconocíes ena escena folk asturiana, y con una considerable proyección
internacional. En formatu quintetu, demostraren el so buen facer frente a un
públicu que los aguardaba con interés. Con gayola ena sala pero sin tar demasiáu
llena, con un fosu imaxinariu ente l’escenariu y el públicu que se mantuvo
presente tola nueche, los d’Avilés empezaren con Lorient, tema del so últimu discu ’Positivo’, demostrando
la so habilidá y autoridá sobre l’escenariu. Un repertoriu repletu de dances,
saltones, muñeires y cantares… temas propios mayormente y dalgunes
composiciones populares que fueren pasando pel escenariu de Valles en un conciertu
preciosista de más de dos hores. La sólida base rítmica de percusión y guitarra
daba fuerza a los penetrantes fraseos de gaita y cordión. El panderu y la voz de
Silvia Quesada, tan dulce y serena como revoltosa según el momentu, completaben
la formación. Un soníu compactu, buenes igües, maestría y buen gustu ena execución
tuvieren presentes a lo llargu de toul recital, que terminaren con un par de
bises y l’apoteosis final protagonizada en solitariu por Jose Manuel y la so
gaita, demostrando’l so talentu en una intensa pieza final que arrancó
ovaciones al públicu.
Pasada la 1 la mañana, y con un
ambiente ya encesu abondu, empezaren a sonar los primeros acordes de la mano de
‘Vrienden’. Esta banda moza procedente de Nava y formada en 2010 por Xurde
Fernández (flauta, whistle y violín) y Nel Suárez (guitarra) fai un folk bien
interesante, qu’ellos llamen ‘Folk fusión alternativu’ y que a estes hores a mí
ya me paecía hasta psicodélicu. Con una formación cenciella -integrada polos ya
citaos xuntu a Pedro Santiago a la percusión (caxón y bodhram) y Juan Duarte a
la voz- pero palpitante en tou momentu y mui animada, enseguida conectaren
col públicu que bailó y acompañó con
palmes munchos de los temas. En Valles presentaren los temas de la so primer
grabación, ‘Vrienden’, pol que acaben de recibir el premiu AMAS 2014 al meyor
discu folk. Melodíes con fuerte raíz asturiana armonizada con toques jazzeros,
de hip hop y de world music, lletres intimistes y un altu componente d’improvisación
y llibertá nel escenariu son los elementos que caractericen la música de
Vrienden, que sorprenden en cada tema con propuestes valientes y nada
convencionales. Un grupu al que seguir de cerca la pista y que mos dexó un
agradable, caóticu y clorofílicu tastu ena boca.
Y el sábado llegaren a Valles
‘Los Berrones’. El petazu ena sede fue d’impresión, diríase qu’hasta la bandera
y más arriba si mos gustaren les banderes, que nun ye’l casu. Poques bandes hai
n’Asturies que tengan la convocatoria de Los Berrones y que presten a un
públicu tan diversu. Tán celebrando los 25 años d’esistencia y los sos nueve discos
en mercáu, daqué que ye estraordinariamente difícil de conseguir n’Asturies y
que supón un gran méritu. Amás de los componentes orixinales de la banda -Ramón
Blanco a la guitarra y la voz (ESA voz), y Olegario Méndez al baxu- completaben
la banda los ya históricos Chema Fombona a la batería y Julio Gilsanz a la
guitarra solista. Arrancar y nun aparar fue tou unu. ’A cabruñar’, ‘El tambor’,
‘Agárrate al mangu’, ‘La del estudiante’, ‘Nun yes tú’ o ‘Borrachón’ son dalgunos
de los grandes ésitos que la banda fue enriestrando, y que fans de toles edaes -neños,
mozos y mayores- bailaren y corearen en un ambiente de lo más folixeru. Con un
pop-rock cenciellu, casi adolescente, estribillos y coros pegadizos y lletres con
retranca enes que ye fácil sentise reconocíu, consiguieren definir un estilu
mui personal que ya ye casi ‘marca rexistrada’. Nun faltaren tampocu versiones
d’Eric Clapton, The Police, los Stones o los Stukas. Tras casi dos hores de
conciertu y un par de reclamaos bises, terminaren una esitosa actuación tras la
que s’enredaren un buen cachu ena firma de discos y les fotos colos fans al más
puru estilo ‘rock star’. Un cierre brillante el de Los Berrones a estos III Alcuentros
de músiques feches n’Asturies, que ya se consolidaren ena programación de la nuestra
asociación y que demuestren la significativa afición qu’existe nel nuestru
conceyu y contorna pola música asturiana.
Conchi Gálvez
Traducción de Miguel Isla
