Nuechi d’éxitu y de
participación ciudadana la vivida el pasáu sábado ena nuestra sede en Valles. El
conciertu celebrábase con una motivación especial, la de recaudar fondos d’apoyu
a la celebración del XXXV descensu en piragua del ríu Piloña, un eventu deportivu
y de folixa de fonda tradición nel nuestru conceyu, que munchos recordamos con cariñu
tras aquelles históriques fiestes de los años 70 y 80, y que, depués d’unos
años d’abandonu, quier volver a entamase col esplendor d’antañu. Ansina, col puxu
de delles asociaciones locales: el club de piragüismu Neptuno, Los Tritones, l’asociación
de comerciantes Coservi y la de muyeres ‘Les Llamoses’, organizóse l’eventu nel
que, como nun podía ser d’otra manera, Bocanegra dio la so aportación musical.
Nesta ocasión el broche melódicu vieno
de la mano de la banda moza -anque repleta de veteranos- ‘La armónica en el desván’, de nombre tan
evocador como virtual.
Antes de les once
la nuechi la sede ya disfrutaba d’un ambiente curiosu. La decoración, con
banderines y piragua incluyíos, sumada a los clásicos y coloríos collares
piragüeros fechos a mano por ‘Les Llamoses’ pa la venta ente los asistentes,
resultaben de lo más evocador. Enes pantalles proyectábase un videu con imáxenes
del descensu del añu pasáu y, enantes del arranque del conciertu, el presidente
del club Neptuno, Vicente Llerandi, subió al escenariu pa pronunciar unes
palabres d’agradecimientu y apoyu a la organización del eventu.
P’hacia les once de
la nuechi arrancó’l primer pase de la banda, cuartetu integráu pol piloñés Jose María
Aladro -conocíu pola so participación ena banda folk ‘Cuerria’- a la guitarra rítmica y la voz, Evaristo Roig
al baxu y coros, Jose Sanz a la batería y Alain Mendez a la guitarra solista.
Un grupu de pop rock que prácticamente s’estrenaba ena nuestra sede, y que, sin
embargu, mostró gracia, soltura y saleru sobre l’escenariu. Sin grandes
pretensiones, pero serios y cumplidores nel so llabor, tresmitieron bien claru durante tola nuechi’l so gozu eriba
les tablas. Ofrecierenmos un repertoriu bien variáu, con temas clásicos del
pop-rock nacional e internacional bastante conocíos pa un públicu piragüeru maduru
y señardosu, col que conectaron ensiguida. Empezaren con un tema propiu que
convidaba a quemar la nuechi, seguíu de versiones de Revolver, JJ Cale, Dire
Straits, la Creedence y Antonio Flores. Pesie a que se-yos notaba cierta falta
de rodaxe, mostraren una buena interacción y complicidá
col públicu, entregáu a ‘la causa’ y con gana de pasalo bien. Como suel ser
habitual, los de abaxu empezamos un pocu paraínos enos primeros temas, para
entrar nel segundu pase con más calor y bailongu. Nesta parte incluyeren tres
nuevos temas propios, que piensen seguir incrementando, y otros conocíos de Los
Secretos, Loquillo o George Harrison, entee otros.
Gracies a la más
que notable presencia de los aficionaos piloñeses, y a la collaboración
desinteresada de ‘La armónica en el desván’, alcanzárense nel conciertu más de
600 euros -a los que se sumarán los recaudaos desde la fila 0-, que se-y darán
a la organización del descensu. Magnífica la respuesta cola que la sociedá
local respondió al llamamientu del históricu club Neptuno d’Infiestu, asina
como del restu de’asociaciones que trabayaren con un mismu oxetivu, demostrando
que’l movimientu civil nel conceyu ye ún de los sos mayores activos, una
realidaá sólida y eficiente, que trabaya día a día creando alternatives mui
variaes pal ociu, el deporte y la cultura nel nuestru entornu.
Desde l’asociación
Bocanegra espresamos el deséu de que’l próximu 26 de abril el descensu del ríu Piloña
resulte de lo más exitosu, y animamos a tolos piloñeses y visitantes a participar
en él cola misma gayola y entusiasmu d’aquellos gloriosos años.
Traducción Miguel Isla
No hay comentarios:
Publicar un comentario