viernes, 24 de enero de 2014

CRÓNICA TRAVELLIN' BROTHERS & DAVID GIORCELLI 18/01/2014

Nueche de sestu aniversariu pa la nuestra pequeña-gran asociación, que ñació de manera casi improvisada de la mano d’un mañizu de llocos pola música y que hoy ye ya un referente ente les sales de conciertos asturianes pola so programación, el soníu y el toque Bocanegra. La sede casi llena destila un ambiente de lo más variáu y distendíu –cosa que mos presta- un buen cachu antes del empiezu del conciertu. Saludamos a munchos socios y amigos, llegaos de distintes partes d’Asturies pa participar ena celebración d’esta –pa algunos- inconcebible efeméride, y disfrutar de la presencia d’una gran banda que prestó abondu l’añu pasáu y que paecía apuesta segura pa deparanos una gran nueche. A les 11:00, y primero de que los músicos suban al escenario, la presidenta Ana Canteli felicita a l’asociación polos seis años d’existencia, polo vivíu y conseguíu, y agradez el trabayu desinteresáu de la directiva, pola que pasaren ya munches persones nesti llargu periplu dexando la so impronta en mayor o menor midida. La xente aplaude y vitorea. El local ta ya hasta la bandera, y hasta cuesta alcontrar un güequín pa acomodase. Enseguida suben los Travellin Brothers en formatu instrumental: guitarra, baxu, hammond y batería. Esta vez vienen sin el tríu de metales que tantu mos prestó l’añu pasáu. Pero ye igual. Namás sonar los acordes de “Up the line”, el blues inunda la sede y les sorrises empiecen a rular de boca en boca.
Travellin’ Brothers ye una banda ya consolidada. A la formación base de 6 musicos (guitarra, baxu, batería, teclaos, voz y saxofón) xúntense de normal otros dos metales, y cuando la ocasión lo permite, toa una big band que yos da un mayor toque de swing. Ocupen l’escenariu con autoridá, seguros d’un repertorio que dominen y nel que alternen temas de los sos tres discos con clásicos de dellos estilos de blues: Chicago, R&B, Memphis, Shuffle. Nesta ocasión dan además protagonismu al boogie de la mano del impresionante pianista David Giorcelli, acompañáu de la vocalista Ster Wax que completa la propuesta con un toque daqué souleru.
Col evocador “Into the blue”, tema propiu de la banda, sube a la palestra el vocalista Jon Kareaga, un finu con soltura nel escenariu, voz satináu y maneres de gángster de Bilbao, que depués del “Hoochie Coochie Man” de Willie Dixon da pasu a un de los invitaos de la nueche, el pianista David Giorcelli, que bien lluego mos demuestra por qué ta consideráu un de los meyores intérpretes de boogie de la escena actual. Con “Kansas City” y, sobre tou, col endemoniáu “Shake Rate and Roll”, l’hombre con cara de despiste y de “yo pasaba per equí” conviértese en un vivu executante, un demoniu incendiariu que martiella sin cansar el piano con acordes encadenaos y escales desmanaes que recorren el tecláu arriba y abaxu hasta -literalmente- salir del mismu. Depués d’un par de temas de la banda, incorpórase al grupu Ster Wax, muyer con voz potente, de rexistros amplios y carácter sobre l’escenariu. Interpreta con David dellos temas enos que demuestra garra y señoríu col micro, como el clasicu “Allright, Okay, You Win” o la balada “Love her taste”.
La banda va dándolo tou ensin desgaste aparente. Solidez ena base rítmica (Eneko Cañibaño al baxu y Isi Redondo a la batería, discretos y elegantes), un guitarrista espresivu y ardiente (Aitor Cañibaño) y un teclista (Ander Urzaga) omnipresente que hoi tuvo que repartir protagonismu col artista invitáu. El soníu potente de la sala y la marcha del públicu animen el cotarru y los músicos disfruten. Cerca ya del final, la apoteosis con temazos como “Swing and Jive”, que’l públicu corea de lo más animosu, “Sweet Little Angel” de BB King, “Little by Little” o el “I Just Wanna Make” de Willie Dixon, enos que Jon y Ster combinen voces.
David Giorcelli y Ander Urzaga dan-y fueu a un tema a cuatro manos y, sube tamién cola armónica l’amigu Manuel Velasco, llegáu desde Uvieo y mui fan de los Travellin’ Brothers, a los que acompaña en un par de temas, como siempre con mui buen rollu. Ya pa terminar, l’himnu “When the Saints Go Marching In”, que toos sabemos y cantamos, y un bis con “Midnight Train”, escelente tema propiu con aires de R&B que, como siempre, mos dexa con gana de más y más. Despídense con un “hasta pronto” que se fadra realida de xuru l’añu que bien per estes mismes feches, anque ya hai quien fala de fletar un autocar de Bocanegras pa dir a Bilbao a escuchalos cola big band. En fin, ya veremos.
Una vez más, trunfa lo guapu, lo sublime, la emoción de la música en directu sobre les miseries cotidianes, y por unos momentos toos somos felices. Ehí ta l’encantu y el poder. Esi ye l’espíritu que nueche tres nueche invocamos en Valles, y que esperamos se mantenga polo menos otros 6 años. Hasta esi momento, allá mos alcontraréis.
Conchi Gálvez
Traducción de Miguel Isla


No hay comentarios:

Publicar un comentario