Broche d’oru al añu
2013 en Valles cola banda ‘Supersweet’, que mos ofreció un maraviyosu, enérxicu
y intensu ‘Tommy’, un de los discos más conocíos de la banda ‘The Who’. El tríu
de San Sebastián ta integráu por Imanol G.
(guitarra y voz principal), Andoni E. (batería
y coros) y Avaro T. (baxu-teclaos y coros). Los dos primeros lleven ya venti
años xuntos tocando en diverses bandes, a los que darréu
se xuntó l’organista pa formar ‘Supersweet’,
onde exerce les funciones de baxista dende’l tecláu. Hasta’l momentu, nesta
formación tienen grabáu ‘The Hereafter’, un discu bien recomendable, de fondos raigones british.
L’homenaxe al
míticu discu de los Who, compuestu mayoritariamente por
P.Townshend, ñació en respuesta a la proposición d’una sala donostiarra pa un únicu
conciertu, pero convirtióse nun proyectu más sólidu que-yos llevó dos años
completos, con un total de 37 conciertos
repartíos a lo llargu y anchu de tou el Estáu. En Valles cerraben etapa, bien satisfechos
de lo conseguíu, pero con gana de retomar los sos propios proyectos.
El tríu muestra un
directu mui potente y arrollador, fiel semeyu de la música y l’espíritu de la
banda británica. La estética y actitú de los músicos n’escenariu, y la pantalla
que de fondu mostraba semeyes de los músicos y del imaxinariu ‘The Who’,
contribuyeren a metenos nel frenéticu universu de la banda, delantre d'un públicu espectante y más que sorprendíu pola complexidá armónica de la obra y la so
impactante execución. Y ye que Tommy nun ye un discu típicu, nin fácil d’escuchar
y entender ensin afondar ena so estructura y argumentu. Definida como la
primera ‘ópera rock’, suel comprarásela más con una cantata, una composición esencialmente
vocal con acompañamientu musical. Amás de lo enrevesáu de la música, en Tommy les
voces constituyen un elementu fundamental de la obra, participando
esencialmente ena orixinal Daltrey, Townshend y Entwistle y apenes el baterista
Keith Moon. En Supersweet, los tres intérpretes participen vocalmente, siendo realmente
increíble la capacidá del baterista Andoni compaxinando los agudos coros cola so
complexa execución col instrumentu.
El conciertu, con
un soníu absolutamente impresionante, resultó un fiel semeyu del recoyíu nel
discu ‘Live at Leeds’ grabáu en directu pol cuartetu londinense en 1970. Dividíu en cuatro partes -al inicio de caúna’l
cantante facía una breve introducción argumental- fueren encadenándose ensin
pausa los míticos temas de la obra, desde la sinfónica ‘Overture’ hasta la
gloriosa ‘See me feel me, listening to you’ del final. Pel mediu, sonaren temas
tan reconocibles como ‘The Acid Queen’, ‘Pinball Wizard’, ‘Smash the mirror’
o ‘I’m free’, una de les mios favorites
del discu. Un buen nivel instrumental y vocal el de los tres componentes,
destacando pola so inmensidá la execución de Andoni a la batería, dignu
herederu del carismáticu y míticu Keith Moon, al que amás de cola so frenética
pegada en tambores y platos, se asemeyaba colos sos xestos y cares de llocu,
dexándonos embobaos cola so brillantísima actuación.
Depues d’acabada la
obra, la banda despidióse con un bis formáu por tres temas ente los que se
encontraben ‘The Seeker’ ‘Substitute’, y
que incluyó un divertíu cachu de ‘My generation’ tocáu al derechu y al revés, lletra
incluyida, y un amagu d’estrozu de guitarra sobre l’escenariu que
sorprendentemente nun llegó a consumase. En resumen, un sobresaliente para
‘Supersweet’ en cuantu a execución, puesta n’escena y interacción col públicu.
Esperamos tenelos de nuevu per Valles en cuantu editen el nuevu discu pa la so
presentación en condiciones.
Conchi Gálvez
Traducción de
Miguel Isla
No hay comentarios:
Publicar un comentario