El conciertu del
pasáu sábado del estaunidense John Nemteh y el so tríu solo puede calificase de
desllumbrante. L’artista llegaba a Valles derechu de Suiza, onde había tocáu la
nueche anterior, y pisaba per primer vez un escenariu n’España... el de Valles,
supongo que frayáu, ensin falar gota castellanu, y ensin saber qué facía en
mediu d’aquel pueblucu enanu. Ena sede aguardábase’l conciertu con mucha gana.
En formatu cuartetu
(guitarra, baxu, batería y voz), la’habilidá del solista cola armónica introduxo
un elementu más ena banda. Nemeth ye un personalísimu y brillante armonicista y
vocalista de soul-blues, un paisanu tralláu ya en mil batalles, con una dilatada
y exitosa carrera al llombu: siete
discos grabaos, innumerables premios recibíos y nominaciones a otros tantos, composiciones
mui personales que beben de l’amplia historia del blues y del soul, y un gran
respetu per parte de la crítica especializada. Como pasa colos más grandes, resulta nel tratu un paisanu cenciellu y afayadizu,
ensin egos, males cares, nin caprichinos de divo. Extensible esti comentariu al
restu la banda, tou sonrises, talentu de lo buenu y buen rollu de principiu a
fin.
Más de dos hores de
conciertu impecable del cuartetu, a falta de los metales que suelen acompañalu
en directos y grabaciones. Una voz deliciosa la de Nemeth con un color mui
blancu, pero llena de feeling y guiños negros, rebosante de matices y de sentimientu,
alternando con solos d’armónica de mui altu nivel. Los músicos pesie a la so xuventú
demostraren talentu abondu y personalidá n’escenariu, una execución mui llimpia
y compacta y buen gustu n’acompañamientos, solos y coros, enos que calcaren unes
armoníes vocales que mos escarabayaren el pelleyu. El batería recordábamos a
Ginger Baker n’estilu y n’apariencia, y caltuvo con aciertu la base rítmica con
un baxista precisu y eficaz nel so papel.
Mención especial
merez el xoven guitarrista Travis Swanson, dotáu de gran sensibilidá,
perfección y elegancia nel so estilu, más arrimaos al jazz de Wes Montgomery ó
Di Meola que a la fuerza bluesera de
Buddy Guy, magar que la so presencia tuviera siempre implícita. La aparente simplicidá
de los que dominen técnica y sentimientu reforzóse col soníu llimpísimu de una Telecaster ensin pedales
ni efectos de ningún tipu colos que calcó p’allá solos antolóxicos.
El repertoriu incluyó
sobre tou temas del so últimu discu ‘Memphis Grease’, grabáu en 2013 ena ciudá
ena que agora reside, alternando blues clásicu como’l de ‘Country boy’ con un
solo d’armónica brutal con baladones
soul como ‘If it aint broke’ , ‘Testify my love’ ó ‘I can’t help my self,’ onde se echaban en
falta los fantásticos vientos del discu o temas onda motown como ‘Back luck is
my name’ ó ‘Sooner or later’, nel que los tres acompañantes se llucieren con
unos coros anxelicales dafechu.
Al final del conciertu
la xente taba alloquecíu, la sesión de fotos y la firma de autógrafos fue tan llarga
que se prollongó hasta bien avanzada la madrugada, cuando los músicos retiraren prometiendo’l regresu a Valles ena
so próxima xira española, esta vez con sección de metales.
El soníu de la
nueche perfectu, impresionante lo que sonaba ellí arriba. Jorge súperase a sí mismu
cuando quier, y a pesar d’estrenar mesa dixital, aquello sonaba con una claridá,
un cuerpo y un empaste maravillosos.
En resume, una
nueche deliciosa ena que mos sintimos en verdá privilexaos por disfrutar en
casa de tal banda tan al alcance de la mano, en un conciertu así de íntimu. Vémonos
en Valles.
Conchi Gálvez
Traducción de Miguel
Isla
No hay comentarios:
Publicar un comentario