De
más que prestosa puede calificase la nuechi d’alcuentru coles músiques de raíz,
enes que vivimos con intensidá la presentación nel escenario de Valles de dos
bandes perasturianes, Corquiéu y SEU, dambes del cercanu conceyu de
Ribeseya. De la primera, pocu se puede dicir que los amantes de la música de
raíz o raigañu nun conozcan yá. Acabante de cumplir los 18 años d’esistencia y
con tres discos en mercáu, la banda supo dir ganando’l respetu de la crítica y
del públicu, que siempre disfruta y participa de manera activa colos músicos a
pie d’escenariu. Sobre les 23:30, y cola sede a mediu gas tovía, arrancaren un
conciertu bien completu y convincente, d’aires primeramente tradicionales
acompañaos con temas de suyu, enos que fueren entreverando balaes y añaes con
saltones, reels y otros ritmos más danzables. El formatu sestetu combinó la
poderosa parte rítmica, aportada por bouzoukis, guitarra acústica y violín, con
melodíes galopiantes y vivaraches –que los oyentes bailaren y palmiaren con
gayola, traíes de la mano de la gaita de Rigu y la magnífica flauta travesera
de David Álvarez. La voz señardosa de Gema García contribuyó de manera
determinante a criar esa atmósfera apacible, llena de nublina, deseos,
estrañeza y murnies que cimienten la música popular asturiana.
Per
parte suya, el quintetu SEU casi debutaba en Valles, pues lleven malapenes un
añu como formación, a pesar de que los sos componentes tienen yá na so mayoría les
sueles gastaes de patiar praos y escenarios de festivales folk y rock. Surdíos
casi como una ‘spin off’ de Corquiéu, pola presencia de Rigu y Paul Balmori a
la gaita y al bouzouqui y voz, respectivamente, a los que s’unió recientemente’l
flautista Santiago, ufren un estilu menos tradicional, más basáu ena fusión,
hasta’l puntu d’autodenominar a lo que facen ‘folk progresivu’, términu que m’encanta.
Y en verdá, sobre tou ena última parte del conciertu s’apreciaren eses
influencies del rock progresivu ena estensión de los temas, y la creciente
complexidá de les estructures y de los arreglos. La presencia del baxu eléctricu
de Joan balmori y la batería de Christian Carrio, uníes a la voz singular de
Paul contribuyen a dar esa presencia contundente, electrizante a veces, apartada
per momentos de les estructures y les melodíes de la música folk. Tienen per
delantre tovía un necesariu tiempu de rodaxe pa llegar a sonar cola solidez y la
seguridá que merecen, y que seguramente sorprenderá a munchos polo arriesgáu de
la propuesta y pola creatividá que muestren, en verdá remocicante ena escena
folk actual.
Conchi Gálvez
Traducción de
Miguel Isla Viesca
No hay comentarios:
Publicar un comentario