Bien prestosu fin d’añu
el disfrutáu en Valles cola actuación de la banda tributu a Supertramp “The Logical Dream”, integrada por
cinco músicos de llargu recorríu pelos escenarios asturianos, y ya disfrutaos
por nosotros en diverses formaciones a lo llargo d’estos años. Estos veteranos touterrenu
xuntárense pa rindir homenaxe al perconocíu grupu que vendió millones de discos
enos ’70 y’80 y forma parte de la banda sonora de la infancia y l’adolescencia
de los que ya pasamos delos 40 y dalgunos más. ¿Quién nun tuvo dalgún LP de
Supertramp rodando per casa o la del primu?.
Los 16 temas
escoyíos pa esti homenaxe reproducen los recoyíos nel doble álbum ‘París’, -abondu
vendíu y pa munchos ún de los meyores del grupu-, grabáu ena capital francesa
en 1979, adoptando tamién una formación instrumental bien similar: Sam Rodríguez (piano y voz), Dani
Herrero (saxo, armónica, melódica, teclaos y coros), Julio Gilsanz (guitarra),
Carlos Laiz (baxu y coros) y Chema Fombona (batería y voz).
La banda consigue alcanzar de manera más qu’evidente, a base de rigor y
meticulosidá, los sonidos y la atmósfera característicos del grupu, que se
movía entre lo complexu del rock progresivu que reinaba enos estudios daquella
y el pop más comercial col qu’esporpollaren hasta l’estrellatu.
Nun ye cenciellu
abordar en directu les complexes y preciosistes producciones de los discos de
Supertramp y por eso recrear un discu en directu parez un llabor más algamaízu.
De cualquier manera, el proyectu de ‘The Logical Dream’ encarna con tinu les ellaboraes
trames instrumentales y les sos característiques armoníes vocales algamando,
con un buen facer que ta col perfeccionismu, recrear la so esencia dafechu.
‘Logical Dream’ ofreciómos
un conciertu complexu, hasta arriba de matices, llargas melodíes y xuegos de
voces, enos que’l protagonismu de los teclaos y el saxofón s’afitó con solidez
ena precisa base rítmica y la rebeldía de la guitarra, que destacó en dellos
solos. Una sorpresa risondera la d’escuchar al amigu Chema Fombona como vocalista, dando descansu al esforzáu Sam Rodriguez, y ver lo bien que se-y da.
El conciertu, que
recoyó los grandes hits del grupu, arrancó colos acordes al piano del ‘Fool’s
overture’, poderosu tema con una sinfónica intro instrumental que mos somorguió
de cabeza ena hipnótica atmósfera de la banda, y ena que’l pianista y vocalista
Samuel mostró la so capacidá vocal p’algamar los lexendarios agudos de Roger
Hogdson. ‘School’, vieno de siguíu, presidíou pola preciosa armónica de Dani Herrero y el so
clásicu ritmu de mediu tiempu. Siguieren con ‘Take the long way home’, y nesi
momentu pensé: Joder, conozco tolos
temas..y yo que creía que había quedáu en el Breakfast in América
A lo llargu de la hora y media restante sonaren
tamién ‘Ain’t nobody but me’, ‘Breakfast in America’ ’Dreamer’, ’From now on’,
‘The logical song’, ‘Goodbye stranger’, ‘Hide in your shell’ ‘Another man’s
woman’, ‘Crime of the century’, ‘It’s raining again’, y pal bis ‘Two of us’
y‘Give me a little bit’. El públicu que llenaba la sala pasólo
perbién, en primera fila los fans de Supertramp que coriaben munchos de los
temas, y detrás los que nun falten a un conciertu, y que ya van siendo un
grupín curiosu.
Una nuechi
entrañable pol tonu señardosu de la música, tan de ‘aquellos años’, pola
cordialidá y l’entusiasmu de los músicos y pol reencuentru nestes feches navidiegues
con vieyos amigos ausentes n’otros momentos del añu colos que pasamos ratos
estupendos. A partir d’agora, nueva programación y buenes sorpreses musicales
pal 2015. Vémonos en Valles.
Conchi Gálvez
Traducción de
Miguel Isla Viesca
No hay comentarios:
Publicar un comentario