Vibrante fue la
nueche vivida col conciertu de Mr. Sipp el pasáu sábado en Valles. El guitarrista
norteamericanu llegaba a Asturies precedíu d’abondos premios, grandes crítiques
y un enorme éxitu de públicu per dayuri: fue dexando un cartel de ‘sold out’ en
toles sales d’esta intensa xira española que lu llevó per nueve ciudaes en díes
pasaos. Toos estos datos paecíen apuntar a una gran nueche de música ena
nuestra sede, como en verdá fue.
La nueva promesa de
los circuitos de blues, que tres de la publicación del so segundu discu ‘The Mississippi
Blues Child ‘
ya ye una realidá consolidada, enllenó l’escenariu de Valles
de soníos frescos basaos ena ortodoxia de la vieya escuela, con aires remocicaos.
El xoven guitarrista, autor, arreglista y cantante entemez composiciones propies
publicaes en dos álbumes con homenaxes mui personales a los sos ídolos de
siempre, como BB King, Elmore James o Jimmy Hendrix. N’escenariu, Mr. Sipp ye tou
rixu, fervederu y poder blueseru. Incansable, con una técnica impecable, y una
gran bayura espresiva, l’artista fue enriestrando
fraseos, melodíes y solos punzantes, tema tres tema, y ensin perder un momentu
el rumbu. A veces con composiciones instrumentales y otras cantadas, que enfatizaben
el heat y la naturaleza bluesera que-y cuerre peles venes. El repertoriu
resultó acertáu de tou, de principiu a fin, surtíu y bien combináu: de los soníos
clásicos del Chicago blues de ‘Roll with you baby’ a los toques actuales y rockeros
de ‘Nobody’s business’, pasando per balaes más sentimentales, ‘Say the word’ o
‘What is love’, a les que amestaba un toque soul perbién arropáu polos
acompañamientos vocales de la so banda.
A los ellí presentes
prestomos de principiu a fin esta propuesta que nun defraudó les espectatives.
Movíos al ritmu arrollador d’este sólidu bluesman, y prendaos de la so marcada
espresividá, pasósenos el conciertu -que nun fue curtiu- en un sospiru. Con un
intensu ‘Little Wing’ escarabayonos el pelleyu anunciando ya un final que allargó
con un bis bien pidíu pol respetable, que como siempre pidía otres tres. Echóse
en falta un mayor protagonismu de la xoven banda, compuesta por una base
rítmica de baxu y batería mui sólida y un teclista que cubrió con finos xergones
los soníos del boss. El que manda, manda, equí y en Mississipi. De cualquier
manera, l’agradecimientu del públicu fue pa tolos músicos, que pasaren un buen peazu
tres el conciertu saludando, vendiendo discos y sacando semeyos con tou’l mundu.
Apuntamos asina ena nuestra bitácora bluesera una nueva y brillante nueche
bocanegra.
Vemonos en Valles.
Conchi Gálvez
Versión asturiana
de Miguel Isla Viesca
No hay comentarios:
Publicar un comentario