Sesión rotunda y
convincente la del pasáu sábado en Valles col cuartetu alemán “The New Roses”.
Les espectatives eren buenes y asina se demostró col aforu de la sala, con un
llenazu considerable y un públicu mui rockeru, sobre tou llegáu de más allá de
les fronteres piloñeses, fechu que se bien repititendo enos últimos conciertos
y que nun dexa de plasmanos.
Con un pelín de
retrasu sobre l’horariu marcáu, hacia les 11:30 sonaren los primeros acordes de
lo que diba ser un incesante homenaxe al hard rock, nel que la banda fue
presentando ún a ún los temas del so discu “Without a Trace”.
El cuartetu –dos guitarres,
baxu y batería- tien en Timmy Rough, vocalista y guitarra solista, la so
auténtica alma, personalizada nuna voz esgarrada, áspera y llena de matices que
mos arrastró per caleyones oscuros y carreteres interminables. Pesie a la entrega
del front man, notóse un daqué de frialdá teutona nel restu de la banda, que
nun terminó de conectar con un públicu encesu y dispuestu a tou, el cual nun
aparó d’animar a los músicos durante les más de dos hores de conciertu. Con un
soníu potente, la banda, que tien más que ver colos Bon Jovi y Aerosmith de los
80 que con Metallica o AC/DC, ofreciómos un recital llenu de sinceridá y
solidez, nel que se notaben les hores d’escenariu, asfaltu y contactu que la
banda lleva al llombu. El conciertu
alternó temas llixeros como "It's A Long Way” o “She's Gone" con
balaones a dos voces y temas más pesaos y escuros como “Devil’s Toy o “Whiskey
Nightmare”, que fecieren les delicies de los más metaleros. Rock and roll
clásicu, sólidu y contundente, ensin virtuosismos en demasía, nel que una fuerte
base rítmica permitía el xuegu de les guitarres y el ya citáu protagonismu de
la voz solista. Depués d’una breve posa, un par de temas en solitariu de Rough
con acústica baxaren un pocu el ritmu del conciertu, que volvió garrar nuevu
ímpetu pa terminar con un bis repletu de buenes versiones de lo más dispares,
demostrando les fuentes clásiques de les que la banda se nutre: Chuck Berry,
Led Zeppelin o Lynyrd Skyryrd y el so “Sweet Home Alabama”.
Buenes sensaciones
les que la banda dexó al pasar per Valles, según dexen entender los comentarios
recoyíos de munchos de los asistentes, que disfrutaren a esgaya ante esta
descarga de enerxía y poderíu rockeru y enrollárense colos músicos mercando un
buen númeru de discos al final del conciertu. Por si daquién tenía daqué duda,
el rock nun ta muertu, amigos.
Conchi Gálvez
Traducción de
Miguel Isla
No hay comentarios:
Publicar un comentario