lunes, 7 de octubre de 2013

CRÓNICA CONCIERTU SOLIDARIU 28/09/2013

El pasáu sábado 28 de setiembre una nueva cita fizo aconceyar a socios y simpatizantes na sede de l’AMCBocanegra. Nesta ocación, la cita contaba con un componente añadíu al puramente musical, pues tratábase d’ayudar a vecinos del conceyu con grandes necesidaes derivaes de los dramáticos problemes económicos y sociales que tamos viviendo. Enos díes previos hubiera solicitáuse la collaboración ciudadana en forma de contribución en comida o en metálicu, y la respuesta resultó más que considerable. Como contrapartida, l’asociación trabayó na preparación d’un conciertu nel que participaren dos bandes de forma altruista dafechu, ‘The Big Trouble Band’, d’Uvieo, y la local ‘The Noise Dealers’.
El conciertu arrancó pasaes les once la nueche, cola sede presidida por una abondante y alentadora pirámide de comida aportada yá  enos díes anteriores, - y que diba seguir creciendo a lo llargu de tola velada-, y un venir constante de persones a les puertes. ‘The Big Trouble Band’ ye una banda de buenos amantes del rock and roll que -en formatu acústicu- recreen con aciertu versiones de temas míticos de los más grandes: Elvis Presley, Jerry L. Lewis, The Doors, AC/DC, los Stones, Creedence, ó  ZZ Top. El grupu taba integráu por dos guitarres que se entendíen perbién, tantu nel so aspectu rítmicu como enos gozosos solos, un baxu efectivu y una percusión omnipresente, tou ello acompañáu de tres voces poderoses, que lo mismu interpretaben en solitariu qu’acompañaben con coros, dando a la banda un puntu de solidez y consonancia bien curiosu. Los temas conocíos y el buen facer del cuartetu nel escenariu animaren al personal al bailotéu y a los coros, demostrando una vez más que les buenes bandes de versiones tienen un puntu seductor y resultón que presta a la mayoría.
La segunda parte del conciertu corrió a cargu de la banda local ‘The Noise Delars’, cuartetu piloñés cuyos miembros ya pasaren per Valles n’otres formaciones, poseedores d’un soníu mui enérxicu, una especie de grunge empoderáu, y un repertoriu que nun dio un momentu de respiru, de pura caña y baturiciu. Con una formación senciella- dos guitarres, baxu, batería, voz y coros- pero frenética, subieren al escenariu con gana y arrodiaos d’amigos y familiares que nun dexaren d’espolialos un momentu. El repertoriu alternaba temas propios con versiones cañeres de clásicos del rock, como ZZ Top ó Black Crowes. D’ente elles, llamónos divertidamente l’atención una encesa versión del famosu tema ‘Tainted Love’ del grupu ochentero Soft Cell.
Podemos dicir con alegría que la recaudación de la nueche, 725 Kg. d’alimentos y 315 € que se donarán a Protección Civil de Piloña, superen les espectatives coles que se convocó l’eventu, ya qu’únicamente se solicitaba un kilu de comida por asistente, y como pudimos comprobar, munchos vecinos del conceyu que nin siquiera fueren al conciertu molestarense en acercase hasta la sede de Valles y dexar ellí la so aportación. La solidaridá a veces existe y manifiéstase, son munches les persones que responden cuando se trata d’echar un gabitu a quienes pasen per malos momentos nestos tiempos tan perros, y a veces solo fai falta crear les canales adecuaes pa facela efectiva. Esperemos poder seguir colos güeyos un pocu abiertos a la realidá que tenemos alredor nuestru, una situación inxusta que mos cayó encima pola avaricia y el descaru d’una mano de seres oscuros polos que pagamos los de siempre,  y qu’esta sensibilidá y empatía nun sean flor d’una nueche, sinón que teamos ehí siempre que se mos precise. Porque nun somos como ellos. Desde l’AMCBocanegra agradecemos con sinceridá tantu les aportaciones de los músicos, que nun cobraren pola actuación, como la de toos aquellos que mos acompañaren nesti conciertu solidariu.
Conchi Gálvez

Traducción de Miguel Isla

No hay comentarios:

Publicar un comentario