Nun sé si ya vos lo hubiera dichu, pero a los de
Bocanegra préstanos abondu el blues. Sí, préstamos munchu’l blues: la so
pasión, el desgarru, el sentimientu, la so enerxía, rebeldía y autenticidá.
Llevábamos tiempu queriendo facer un homenaxe al blues desde l’asociación y,
ena midida de les nuestres posibilidaes, asina fue. Los díes 18, 19 y 26 d’otubre,
la sede de Valles convirtióse per unes hores nun auténticu cruce de caminos onde
músicos, aficionaos, y otres xentes de mal vivir mos axuntamos pa vender les
nuestres sedientes almes al diablu a cambiu d’unes hores de placer.
Estes I Xornaess de blues, qu’esperamos se repitan n’años
venideros, abriérense con ‘King Bee’, quintetu madrileñu integráu polos
hermanos Emilio (armóniques y voz) y Carlos Arsuaga (batería), Alvaro Bouso (guitarra
y voz), Ignacio Mendivil (baxu) y Sergio Fernández (guitarra). La banda, yá
consolidada nel circuitu madrileñu, y con cierta presencia n’Asturies, onde
tien grandes amigos, ufriónos un poderosu y dinámicu conciertu, mestura de soníos
Chicago, Louisiana y Texas. La formación llegaba a Asturies caliente depués d’una
serie de conciertos encadenaos y esto notóse nel escenariu, onde demostraren soltura,
solidez y consistencia, tresmitiendo a los asistentes el so enorme deleite nel
escenariu. Presentaren un repertoriu esquisitamente
escoyíu que daba muestres del so fondu
conocimientu de la historia del blues, integráu por temas de Jimmy Reed, Bo’
Diddley, A.C. Reed, Little Walter, Gary Primich ó Frankie L. Sims, dellos recoyíos nel so discu como’l suxerente ‘The
girl that radiates that charm’ y algún tema propiu. La voz oscuru y reciu
d’Álvaro, dicía a la perfeición colos diversos tonos de les armóniques
qu’Emilio sacaba de la so caxa sin fondu, llenando’l conciertu de buenos
momentos que ficieren ximelgase al
personal a base de bien.
Sobresalen enos temas enérxicos y más rítmicos, anque adolecen de cierta floxera enos más lentos, pa los que-yos falta
dello de fondura, n’opinión nuestra. La puesta n’escena, llena de dinamismu y axilidá,
diba encadenando constantes solos de guitarra y d’armónica que mos ficieren
volar cerca de dos hores desde los campos d’algodón hasta los rascacielos del
Down Town de Chicago. Destacar la enorme presencia de Carlos Arsuaga a la
batería, pura elegancia y versatilidá, con un toque realmente finu, finu,
filipín, que, amás, se marcó un solu magníficu.
El
conciertu d’Edu Manazas & Whiskey Train, felizmente recurrente en Valles,
onde siempre mos dexó perbuenos recuerdos, nun depecionó, confirmando que son
un valor seguru pola so pureza y autenticidá. El cuartetu madrileñu, lideráu
por Edu a la guitarra solista y la voz ta integráu también por veteranos
músicos del circuitu de blues: Pino Sambataro a la batería, Oscar González a la
guitarra rítmica y Phineas Sánchez al baxu. Una formación con más de 15 a años
de rodaxe, carretera y manta. Presentaren el so sétimu discu, grabáu va unos
meses, y que, al igual que el restu, ta enllenu
de les personales versiones de los grandes del blues. El conciertu de Valles
resultó espectacular tantu pola banda como pol soníu. Sorprendentemente a la
hora prevista d’arranque del conciertu la sala taba vacía, y sin embargu, el
gotéu de xente fue constante a lo llargu de les dos partes del mismu, de manera
que se terminó cola sala llena y de lo más vibrante. De principiu a fin
escuchamos puru blues. El conciertu arrancó tranquilu, con medios tiempos que
fueren calentando la banda, pa dir formando adulces una atmósfera electrizante ena
que’l protagonismu de la guitarra se vía reforzáu por una más que sólida base
rítmica. El repertoriu, una delicia. Muddy Waters, Buddy Guy, Albert King,
Howlin’ Wolf, Willie Dixon y otros munchos clásicos apaecen siempre enes
sesiones d’esta banda, adaptándose a la inspiración y les sensaciones de cada
nueche. Una esperimentada puesta n’escena y una escelente preparación técnica
permite a estos músicos tocar ensin repertoriu establecíu; solo los primeros acordes y el tonu qu’Edu imprime
a caún de los temas abasten pa que la banda siga al líder. Asina, nunca suenen
igual; el tonu, los cortes, el ritmu y les improvisaciones son diferentes en
cada ocasión. La banda adáptase, interpreta, sorpriéndese, inventa. D’esta
manera los músicos tán siempre en tensión, y el blues faise auténticu. Acompañándose
d’una voz rasposu y oscuru, llenu de feeling, la guitarra d’Edu, afalagada por
eses xigantesques manes desnudes fala por sí misma a traviés de los doce
compases, llora, grita, susurra. Colos sos rudos acordes, llamaes y respuestes, y esos solos
intensos que se t’espeten ente les pates, el sentimientu d’esti bluesman inunda
l’aire y hipnotízate. La banda tuvo en tou momentu a l’ altura del solista,
cola guitarra d’Oscar adornando y buscando’l so propiu protagonismu, y una
sección rítmica d’infartu. Phineas Sánchez manifiesta de continu la so presencia
al baxu de manera pocu común y bien interesante, aportando una pegada y un
ritmu insólitu a la banda. Al lau d’un batería cómplice y constante que
sostenía la banda en tou momentu y que tamién se marcó un solu antolóxicu.
Finalmente, les xornaes finaren cola actuación de Maraya
Zydeco (María Álvarez, cordión), Michael Lee Wolfe (guitarra y voz), Silvia
Fernández (baxu y voz) y Ethan Winogrand (batería). Tamién repetía esta banda
actuación en Valles, anque con una formación diferente en baxu y batería. El zydeco
del nombre ya fai referencia al tipu de música que presenten, soníu Louisiana y
Nueva Orleans con influencia cajún, con importante presencia de la cordión.
Con una sólida carrera a sus espaldas, y llegada al blues
de la mano de Lee Wolfe a traviés del folk, el blues-grass y otros géneros musicales
de raíz, María dota a la cordión d’una gran versatilidá: a veces suave y
aterciopeláu, ye capaz a adoptar una espresividá y un desgarru que respiguen
cuando ye precisu, pa volver a la llixereza y el ritmu casi inocente enos temas
más bailables.
Nel repertoriu de la pasada nueche aparecieren temas
propios del so discu ‘Maraya Zydeco blues’, como’l sureñu ‘Cajun Food and
Creole’, ‘Never been to Menphis’ que me recordó al gran J.J.Cale, o ‘Flechazo’,
al más puro estilo Chicago. Acercamientos al rock’n’roll y al rythm & blues
de la mano de Fats Domino son otros exemplos de lo escucháu la pasada nueche en
Valles, un repertoriu más eléctricu que’l presentáu l’añu pasáu, pero deliciosu
d’igual manera.
Michael Lee Wolfe ye un buen intérprete de la música de
raíz americana, tien una voz daqué resgada y con tou el pesu de la vida encima,
mui bluesera ella misma, y acompáñase maraviyosamente de la so guitarra, que
salta de ritmos y estilos con una facilidá ablucante. El paisanu acompáñase amás
d’una puesta n’escena divertida, ena que fala y interacciona col públicu de
continu, busca la complicidá de Silvia en chistes y comentarios que presten al
personal y compara al nuestru Jorge col mismísimu Muddy Waters -tovía nun
averiguamos el porqué d’esi paralelismu-.
La presencia de Silvia Fernández al baxu manifestóse de
manera bien evidente a lo llargu de tola nueche, con un groove bien poderosu que
tiraba de la banda con enerxía. Silvia tien amás una voz llena de garra, que demostró
enos constantes coros y nun temón llenu de sensualidá que, sola nel escenariu,
empecipió a capella, pa incorporar lluego cordión y guitarra, y que dexó a más
d’ún esbabayándose.
Una banda, en fin, más que recomendable, integrada por
cuatro grandes intérpretes, incluyíu el discretu pero estilosu y refináu
Winogrand a la batería, colos que pesllamos de manera sobresaliente estes
Xornaes en Valles hasta los alcuentros venideros.
¡Llarga vida al blues, hermanos!
Conchi Gálvez
Traducción de Miguel Isla Viesca
No hay comentarios:
Publicar un comentario