jueves, 21 de agosto de 2014

CRÓNICA GREG IZOR & King Bee 02/Agostu/2014

Nueva cita col Blues en Valles (comonosmola). Una nueche de veranu de les ideales, cola sede llena de cares conocíes y aficionaos bluseros d’equí y allá. La banda King Bee hubiera dexáu per buen recuerdu del so pasu por les Xornaes de Blues del pasáu octubre, y les espectatives ante el solista de la nueche, l’armonicista y cantante estadounidense Greg Izor, eren bien buenes. La nueche prometía, y vaya que si cumplió.
El quintetu madrileño formáu polos hermanos Emilio (armóniques y voz) y Carlos Arsuaga (batería), Alvaro Bouso (guitarra y voz), Ignacio Mendivil (baxu) y Sergio Fernández (guitarra), abrió el conciertu p¡hacia les 23:30 con un par de temas propios, “Dream Girl” y  “ I got to go”. La banda, que cuenta con un sólidu rodaxe, plasticidá y complicidá nel escenariu, y un repertoriu que recorre tolos estilos de blues, del norte al sur, resultó un perfectu acompañamientu pal fantásticu Izor, un auténticu torbellín d’enerxía nel escenariu.
Lo que se vivió esa nueche ye una alcordanza que quedará per munchos años. Blues auténticu enriba les tables, un soníu que partía la pana, músicos entregaos y públicu receptivu y con brenga: el cóctel perfectu. Ensin duda alguna, y a pesar del buen soníu de conxuntu, de la rigorosa base rítmica y el impecable llabor de los dos guitarristas, el protagonismu de la nueche llevólo l’armónica, tantu enos solos de Greg como enos acompañamientos d’Emilio Arsuaga. El brillu y la garra del texanu arriba les tables fecierense presentes namás que apaeció nel escenariu, como un verdaderu huracán, demostrando amás gran complicidá col públicu, a pesar de les nuestres típiques barreres idiomátiques. Alternando armóniques cromátiques y diatóniques en melodíes y solos profundos, bien construíos técnicamente pero arrebatadores y selvaxes n’esencia, camelónos tamién con una voz potente y llena de matices. El paisa ye pura pasión, nótase-y al tocar, al cantar, al falar, al movese. Metiósemos a toos en bolsu: a los músicos que lu acompañaben nel escenariu- que pescaren una buena conada-, al público - que bailaba tema tras tema aparentemente sin cansar- y hasta a un paisanu que pasaba pela carretera cuando salí a llamar por teléfonu y que diciendo “oi, qué bien suena esto” entró al conciertu encantáu.
Ofrecierenmos dos pases potentes y bien llargos, onde fueren alternando temas del so propiu repertoriu -recoyíos enos fantásticos discos que vos recomendamos: “I was wrong” y “Close to Home” de Greg Izor , y  “Po’Boys” de King Bee- con dellos de clásicos armonicistas como James Cotton o Lazy Lester. Nesi tiempu hubo de tou, desde blues Chicago en “Who you living to” ó “I’m yours”, pasando per Luisiana ‘I thought it would be me’ hasta temas más souleros y R&B.  Incluyendo daqué tema al que Izor-y dio cola guitarra (una sorpresa la versión del tema de Dylan “Girl from the north country” con Izar a la guitarra y Nacho Mendivil al baxu), un solu de rítmicos pescozones (yo nun lu vi, porque taba fuera, pero contárenmelo), dúos flipantes y desataos con Emilio Arsuaga, que tamién se llució , y hasta un tríu d’armóniques col amigu Manu Velasco que, ellí presente, se animó a subir al escenariu, volviéndonos ya a los d’abaxu chiflaos dafechu.
¡Qué gran nueche, amigos! Bien d’agradecer a la banda “King Bee” la oportunidá de disfrutar d’esti peazu de músicu y de facenos vibrar colo que más mos presta. Que la vida mos crucie en más ocasiones. Y si ye en Valles, munchu meyor.
Conchi Gálvez
Traducción de Miguel Isla Viesca



No hay comentarios:

Publicar un comentario