CRÓNICA DEL CONCIERTU/MUESTRA DE PABLO CANALÍS 01/06/2013

¿Sabíes que'l soníu de los gongs puede viaxar kilómetros y que na antigua China s'utilizaben como elementu de comunicación ente aldees distantes, que los buzzticks de bambú reproducen soníos d'animales y eren utilizaos polos habitantes d'Indonesia pa espantar depredadores na selva, o que les arpes de boca fueren moneda común de trueque n'Australia, onde los primeros conquistadores-yos les daben a los aboríxenes a cambiu de la propiedá d'enormes estensiones de tierres?

Estes y otres curiosidaes fueren ayer desvelaes de forma amena por Pablo Canalís -músicu avezáu, conocíu baxista del grupu de rock progresivu Senogul y acérrime estudiosu de los instrumentos del mundu- nuna charla inluyida na programación que l'Asociación Bocanegra dedicará durante'l presente mes de xunu a “otres músiques y soníos”. Pablo lleva investigando nesti tema que-y fascina desde va más de 7 años, conoz numerosísimos instrumentos y tien utilizáu más de 50 nes composiciones que formen parte del so reciente discu “Folclores Imaginarios”.

Ante un escasu pero interesáu públicu, pablo fue esgranando, nuna fascinante charla de más de dos hores de duración, l'orixen y la evolución de dellos instrumentos de los cinco continentes -algunos utilizaos yá nel Neolíticu-, incluyendo aspectos relacionaos colos materiales de los que tán fechos, les sos peculiares mecanismos de sonoridá o los sos usos sociales (ritos chamánicos, fiestes de la collecha, ofrendes, rituales de pasu), nuna verdadera demostración de conocimientos etnomusicales. La ponencia incluyó demostraciones en vivu de los instrumentos -en solitariu o acompañáu por Pedro Menchaca y Guzmán Argüello- al igual que d'un documentáu apoyu audiovisual.

Siguiendo la clasificación ideada polos musicólogos Curt Sachs y Erich Hornbostel en 1914, basada nes propiedaes físiques de cada instrumentu y el modu de xeneración del soníu, Pablo fue presentando los instrumentos en cuatro categoríes: Aerófonos (Vientu); Idiófonos (Percutíos); Cordófonos (Cuerda) y Membranófonos (Percusión). Asina, ún tres otru fueren pasando delante los nuestros güeyos y oyíos artefactos de nombres tan evocadores como marínbula, udu, kalimba, cuencu cantor, didgeridoo, palu d'agua, kaval moldavu o springdrum, utilizaos desde tiempos remotos na música popular del Caribe, Asia, l'África y Oceanía.

Una clara demostración de la riqueza y diversidad de la música como llinguaxe universal y soporte de les manifestaciones culturales que los pueblos y etnies surdíos en puntos estremaos del planeta supieron crear a partir de los recursos naturales del entornu. Valiosos testigos que se transmitieren de xeneración en xeneración hasta los nuestros díes y, sin embargu, fueren ignoraos y vueltos invisibles pola soberbiosa cultura occidental, permaneciendo desconocíos pa la mayoría de nosotros, y descubiertos nos años setenta pola escena del jazz, el rock progresivu y la fusión.

Agradecemos a Pablo Canalís & amigos la interesante esperiencia compartida'l pasáu sábadu en Valles y deseamos-y muncha suerte nos sos presentes y futuros proyectos, dotaos siempre d'una singularidá esceicional y un peculiar sentíu creativu.
http://www.youtube.com/watch?v=q6HtgQ0mC_k
http://www.pablocanalis.es/

Conchi Gálvez

Traducción: Miguel Isla