Tou
el calor y el color de Brasil inundaren el pasáu sábadu la sede de l’asociación
Bocanegra con un cuartetu de categoría, cerrand asina’l ciclu “Otres músiques”
qu’ocupó la nuestra programación del mes de xunu. Vaudí Cavalcanti llegó a
Asturies va 20 años, y desde entós fue convirtiéndose nun verdaderu embaxador y
divulgador de la música del so país. Yá sía a traviés de los siete discos que
tien publicaos, enos que incluye temas propios y versiones de los artistes que
más-y presten, ya enos shows en vivu con distintes formaciones –siempre
acompañáu d’escelentes profesionales-, y con un buen rollu y un empeñu
envidiables, el músicu de Recife recorre incansable Asturies y l’estranxeru
como un modernu apóstol de la bossa nova y la música popular brasileña surdida
enos años 60, sin olvidar otros ritmos más tradicionales como’l samba, el frevo
o el forró. Nesta ocasión, pudimos disfrutar del innatu ritmu y musicalidá
d’esti artista en Valles acompañáu d’un tríu de “all stars”: Jurandir Santana,
guitarrista procedente de Salvador de Bahía y acabante d’afincar en Barcelona,
ye un músicu de llarga trayectoria, bien respetáu nel so país, un verdaderu ánxel de brasiljazz,
qu’une a la so depurada técnica una elegancia y un sentimientu cautivadores.
Per parte suya, la maestría de Tony Cruz al baxu ta mui allá de toa duda, como
ya demostró nes distintes ocasiones nes que pasó per Valles. Con un potente y
rigurosu groove, dota a la banda d’un colchón rítmicu robustu y sofisticáu,
llenu de matices, qu’aporta a cada tema un cuerpu especial. Difícil llabor el
del batería suplente pa acoplase a esti ellaboráu ritmu y, nostante, Chema
Fombona consiguiólo, superando la preba con un notable más que altu. Envueltu
nuna entamada d’última hora pa sustituir a Carlos Manckuzo, subió al escenariu
ensin un solu ensayu y ensin conocer el repertoriu. Solo los grandes son
quienes a asumir estos retos d’última hora, y Chema demostró que tien un
background tremendu y una sangre fría –o caliente, según se mire-
estraordinaries. El conciertu arrancó p’hacia les once la nueche, cola sede a
mediu aforu. Ritmos suaves y bossa llegaben de la manos del “Brasil pandeiro”,
el “Falsa baiana” del gran Joao Gilberto o el “Eu te devoru” y el “Sina” de
Djavn, que fueren dando pasu a temas más marchosos, como el sonáu “Fato
consumado”, del mismo autor, y el primer funky de la nueche, un poderosu
“Jacksoul”, onde los presentes yá irremediablemente mos balanciabamos sin poder
aparar, hipnotizaos por eses máxiques cadencies. Los impecables solos de
Jurandir –al que siempre llamo “El Benson de Bahía” pola semeyanza col estilu,
la llimpieza y el gustu de los sos fraseos col famosu norteamericanu, y por esa
técnica tan bensoniana de cantar les notes enes improvisaciones que nun sé cómo
se llama-, diben subiéndomos al cielu a cachos.
Depués
d’una breve posa, Vaudí y Jurandir subieren al escenariu pa interpretar la
intimista versión que feciera en so día Caetano Veloso del “Billie Jean” de
Michael Jackson, pa dar pasu, yá colos cuatro músicos en plena forma sobre les
tables, a la parte más cañera de la nueche, y asina, baillando sin aparar
disfrutamos – cola sede y la terraza llenes yá- de temones como el conocíu y
dulce “Capim”, de nuevu el funky colos “Olhos coloridos” de Sandra de Sá, o el
“Linha de passe” del enorme Joao Bosco. Les referencies al Brasil más
folklóricu y rítmicu llegaren cola versión de “Qué bloco é esse”, típica marcha
d’antroxu del nordeste brasileñu, y el “Morena tropicana, col que Vaudí
reivindicó los sos raigaños pernambucanos. La banda sonaba mui caliente, sólida
y compacta, y el buen soníu permitía distinguir con claridá les floritures de
caún de los músicos, toos nel so papel con una maestría admirable. Tres
l’anunciu de la despidida y los espectaculares solos de baxu y batería, la
banda ofreciómos un par de bises, el primeru interpretando el preciosu
“Samurái” de Djavan, que Vaudí dedicó al so amigu y antiguu collaborador Juan Florenti,
bien conocíu per estes tierres, terminando col famosu “Flor de Lys” cantáu en
castellanu y portugués. Una gran nueche de folixa na que los presentes disfrutamos
abondu, tantu desde abaxu como desde’l propiu escenariu, tal y como mos
comentaren los músicos al terminar l’actuación, y que dexó l’espíritu plenu de bien
prestoses sensaciones a los munchos aficionaos a la música brasileña. Quiero
destacar tamién la cordialidá d’estos grandes músicos, así como la so humildá y
senciellez, que los fai tovía más dignos d’admiración y que a veces ye tan
difícil d’alcontrar ena música y ena vida en xeneral.
Conchi
Gálvez
Traducción
de Miguel Isla
