Otra nueche llena
de watios y poderíu rockeru la que mos ofrecieren ‘The Jokers’ ena nuestra sede
el pasáu sábadu. Depués del buen recuerdu que la banda mos dexó nel conciertu
de 2013, les expectatives per parte nuestra eren grandes, y el cartel de ‘completu’
ena sede de l’asociación asina lo corroboró. El cuartetu de Liverpool terminaba
esa nueche una xira española bien llarga, que yos fecio recorrer les cuatro
esquines del país con un resultáu satisfactoriu en opinión de suyu, y de la que
llegaben a Asturies con un sorprendente buen cuerpu. Presentaben nesta ocasión
el so segundu discu, ‘Rock ‘n’ Roll is Alive’, que faciendo honor al so nombre
ta repletu de rock clásicu, contundente y xenuín, con pincelaes de bravu
hard rock, y que los componentes de la banda supieren defender con enerxía
sobre l’escenariu.
La banda empecipió fuerte
col potente y ya conocíu ‘Shake’, tema del so primer discu, al
que’l públicu respondió con gayola y palmes. Con ‘V.i.b.e.’ la guitarra
de Paul Hurst desató’l protagonismu que pinchaba y que nun diba dexar
d’amartiellar los nuestros oíos en tola nueche, repletu de poderosos riffs y
llargos solos que nun dexaren d’allegrar los corazones de los rockeros ellí
presentes.
Per tou el conciertu la
banda mantuvo una actitú expansiva y de continua interacción col públicu a
pesar de la barrera idiomática que’l vocalista Wayne Perry compensaba con
muestres efusives y agradecimientos costantes. Un frontman entregáu y en
persistente fervor, dotáu d’una voz non demasiáu poderosa pero sí llena de
matices y perfectamente concasada cola orquestación y los coros del baxista
Simon Hurst. En ‘Radio’ acercárense a la so balada más ochentera, un pocu al
estilu de les grandes bandes norteamericanes d’aquellos años, pa llegar al
descansu con un firme ‘Let it rock’, que disfrutamos col guitarrista ximelgando
furiosu la melena al aire y col mástil en plena erección.
Col públicu ya encesu y
con gana de caña, el segundu pase fue una bayura de xenuín espíritu rockeru.
Alternaren balaes clásiques como ‘Hell to LA’ o una preciosa ‘Ocean of
Kings’ (qué guapa la suave introducción, recórdabame a los Zeppelin más
líricos) con otros que sonaben como verdaderos cañones, como el
tremendu ‘Jam’, un elegante homenaxe a AC/DC. Pal final y los
bises, que siempre mos dexen con fame, el regalín de ‘Helter Skelter’ (delles
son ya les bandes que versionaren esti tema per equí) y Silver City, ena que’l
públicu se’esgañitó nel estribillu a petición del vocalista.
Bien destacable el llabor
del baterista Dan Evans. El rapaz, pesie a la so envidiable mocedá, dexómos
ablucaos con una pegada llena de personalidá y una enerxía tremenda, que
llevó al grupu alantre per tola nueche.
En resumen, buena
música, gran ambiente y munchu calor humanu fue lo que pudimos vivir en
Valles ‘los de siempre’ y algún más. Seguimos pa bingo. Hasta la próxima.
Conchi Gálvez
Traducción de Miguel Isla
No hay comentarios:
Publicar un comentario