“Hemos de mirar dientro de nos, dientro de les profundidaes de les
nuestres almes, hemos de convertinos agora n’algo que nun fuimos antes, daqué
que la nuestra Educación, Esperiencia y el Nuestru Mediu Ambiente mos tien
preparáu. Hemos de engrandecenos, más de lo que nunca fuimos; con más coraxe,
mayor espíritu, más llarga visión. Nosotros tenemos de ser parte de la Nueva
Raza que vien, abandonando sistemes prexuiciosos y debiendo la nuestra
intelixencia non a una nación sinón a los nuestros hermanos y hermanes dientro
de la Comunidá Humana”. Palabres de Haile Selassie, Jah Rastafari.
El pasáu día 31 de agosto l’asociación
Bocanegra celebró una xornada de lo más fraternal na nuestra sede de Valles,
tantu pola comida de hermandá previa a l’asamblea anual, como pola posterior velada
protagonizada pol reggae, quizá la música más amigable y conciliadora de les
que sonaren per estos llares.
La corderada a la estaca -digna de
mención-, a la que siguió l’asamblea anual, dio pa la comida y la cena, y a la
vista de de la formidable cantidá de carne y osamenta que circulaba per
aquelles meses, más paecía que l’expertu cocineru mos hubiera asáu un
tiranosauriu.
Sobre les 20:30, y con numerosa
peña nes puertes de la sede, la música empezó a sonar al más puru estilu sound system a traviés de la
pinchada de dos miembros de Asgayah Sound, un colectivu de dj’s asturianos (Twin dread, Segun y N'ast fayah selektah) formáu nel 2012 col propósitu de reavivar la
escena reggae n’Asturies, prácticamente inexistente. Ritmos cadenciosos y suxestivos,
que diben alternando toles variantes de la música reggae, desde los clásicos
rocksteady y roots hasta los temas más modernos con influyencies electróniques. Depués de la
motivadora sesión, y mientres la xente nun aparaba de llegar y de dir llenando
la sede, iniciaren el directu los asturianos Irie Nanara (qu’esa nueche
debutaba nos escenarios, y asina lo comentó emocionada al públicu presente) y Buenas
Vibraciones, que l’acompañaba a la guitarra. Sencillez, ritmu y compromisu nunes
composiciones llimpies y llenes de positividá, purificación espiritual y
llucha contra’l sistema dominante que diben animando a
un públicu más que receptivu.
La nueche
continuó cola actuación de la banda madrileña Blueskank, sextetu formáu en
2007, y verdaderu referente ya dientro del panorama nacional, que fai un reggae
con influyencies de otres músiques negres -blues, funk, soul- realmente
deliciosu. La banda, que acudió a Valles en formatu tríu acústicu (dos guitarres
y percusión) tien ya tres discos en mercáu: ‘Landing’ (2009), ‘Peace on you’ (2009)
y ‘Taking Off’ (2011) al que se añade el reciente ‘The Wisser, the Better: From
the inside’ (2013), en descarga gratuita n’internet. Si bien argumenten que la
so mayor apuesta ye pola calidá de les composiciones y de les producciones, que
cuiden hasta’l últimu detalle, el directu nun dexa de ser exquisitu igualmente.
Elegancia y sentimientu absolutos, buen facer instrumental, voces perfectamente
armonizaes y consignes acertaes que reivindicaben los principios más
elementales del movimientu reggae: respetu, bondá, hermandá, verdá,
revolución... Una pena qu’esti delicáu y intimista universu, del que munchos tábamos
disfrutando absolutamente clisaos, se viera ensombrecíu polos desagradables glayíos
y el barullu de la terraza, repleta y ayena dafechu al desarrollu del conciertu
y que molestó tantu a los músicos como a los oyentes. El tríu prestó, y munchu.
Ficieren tres bises aplaudiísimos, vendieren discos y merchandising y mostrarense
en tou momentu de lo más corteses y atentos col públicu que se acercó a
saludalos tras l’actuación. Un conciertu de categoría d’esta banda, a la qu’hai
que seguir de cerca, y que continuó con una nueva participación nel escenariu de
los artistes asturianos que iniciaren la nueche, Irie Nanara y Buenas
Vibraciones, a les que se sumaren los miembros de Blueskank y que continuó con
una nueva pinchada hasta les mil quinientes. Nueche repleta de color, sentimientu,
buenes vibraciones y efluvios caribeños, ideal pa dicir adiós a esti calurosu
veranu que disfrutamos n’Asturies y que aprovechamos bien en Valles, siempre
col puntín Bocanegra que tantu mos caracteriza.
